Владимир Путин Шавкат Мирзиёевга табрик йўллади
Россия Президенти икки давлат ўртасидаги конструктив мулоқот ва яқин ҳамкорликни давом эттиришга тайёрлигини билдирди.
Россия Президенти Владимир Путин Шавкат Мирзиёевни таваллуд куни муносабати билан табрик йўллади.
Табрикда Владимир Путин Шавкат Мирзиёев раҳбарлигида Ўзбекистон ижтимоий-иқтисодий ривожланишда салмоқли натижаларга эришгани, шунингдек, мамлакатнинг халқаро майдондаги нуфузи сезиларли даражада ошганини алоҳида таъкидлади.
Россия Президенти, шунингдек, Шавкат Мирзиёевнинг Россия–Ўзбекистон кенг қамровли стратегик шериклик ва иттифоқчилик муносабатларини мустаҳкамлашга қўшган кўп йиллик шахсий ҳиссасини юқори баҳолади.
Владимир Путин табрик йўлловида икки давлат ўртасидаги дўстона муносабатларни юксак қадрлашини билдириб, икки томонлама, минтақавий ва халқаро кун тартибидаги долзарб масалалар юзасидан конструктив мулоқот ҳамда яқин ҳамкорликни давом эттиришдан мамнун бўлишини қайд этди.
Сўнгида Россия Президенти Шавкат Мирзиёевга мустаҳкам соғлик, бахт-саодат ва давлат фаолиятида муваффақиятлар, Ўзбекистон халқига эса тинчлик, фаровонлик ва янги ютуқлар тилади.
