Исроиллик кўчманчилар Ғарбий Соҳилдаги икки масжидга ўт қўйди
Ҳодиса икки кун аввал юз берган қонли тўқнашув ортидан содир бўлди.
Фаластин расмийлари маълумотига кўра, якшанба куни тонгда исроиллик кўчманчилар Ғарбий Соҳилдаги Қусра ва Кур қишлоқларида жойлашган масжидларга ҳужум уюштирган. Бу ҳақда Reuters хабар берди.
Қайд этилишича, Наблус жануби-шарқидаги Қусра қишлоғида яқинда қуриб битказилган масжид ёқиб юборилган. Ҳужумчилар бино деворларига иброний тилида "Яҳудийларнинг қасоси" деган ёзув ҳамда Тал қишлоғи яқинидаги тўқнашувда ҳалок бўлган исроилликлардан бирининг исмини ёзиб қолдирган.
Шунингдек, Тулкарм жануби-шарқидаги Кур қишлоғида ҳам масжидга ўт қўйишга уриниш бўлган. Маҳаллий кенгаш вакили Фарид Жиюси ибодат қилаётган фуқаролар ёнғинни масжиднинг асосий қисмига тарқалишидан олдин ўчирганини маълум қилган.
Мазкур ҳужумлар 25 июль куни Наблус яқинидаги Тал қишлоғида юз берган қуролли тўқнашув ортидан содир бўлди. Ўшанда исроиллик кўчманчилар бостириб кирган ҳудудда юз берган отишмада тўрт нафар фаластинлик ва икки нафар Исроил аскари ҳалок бўлган эди.
Исроил армияси Қусра қишлоғида ўт қўйиш ва графитилар ёзилгани тасдиқланганини, гумонланувчиларни қидириш ишлари олиб борилаётганини билдирди. Ҳарбийлар диний масканларга қилинган ҳужумларни қоралаб, воқеа юзасидан далиллар тўпланаётганини маълум қилган.
БМТ ва Фаластин маъмурияти маълумотларига кўра, 2023 йил октабр ойида Ғазодаги уруш бошланганидан буён Ғарбий Соҳилда исроиллик кўчманчиларнинг фаластинликларга ҳужумлари кескин кўпайган. Жорий йилнинг ўзида бундай тўқнашувларда ўнлаб фаластинлик ҳалок бўлган, юзлаб киши жароҳатланган.
Жума кунги ҳодисадан сўнг Исроил бош вазири Бинямин Нетаняху ҳудудга қўшимча ҳарбий кучлар юборишни буюрди ҳамда хавфсизликни кучайтириш мақсадида янги яҳудий посёлкаларини қуришга рухсат берилишини маълум қилди.
