Навоийда Damas'да 17 нафар боғча боласи ташиган ҳайдовчи жазоланди
Ҳолат юзасидан унга нисбатан маъмурий чора қўлланилди.
Навоий вилояти Қизилтепа туманида боғча тарбияланувчиларини транспортда ташиш қоидаларини бузган ҳайдовчига нисбатан қонуний чора кўрилди.
Маълум қилинишича, ҳолат 21 июль куни Қизилтепа туманидаги Ванғози маҳалла фуқаролар йиғини ҳудудида хизмат олиб бораётган ҳуқуқбузарликлар профилактикаси инспекторлари томонидан аниқланган.
Текширув давомида Damas автомобилининг олд ўриндиғида уч нафар бола ўтиргани маълум бўлган. Транспорт воситаси тўхтатилгач, унда ҳайдовчидан ташқари 17 нафар боғча тарбияланувчиси ва бир нафар боғча ходимаси борлиги аниқланган. Шу тариқа автомобилда жами 18 нафар йўловчи ташилган.
Қайд этилишича, ҳайдовчи ҳуқуқни муҳофаза қилувчи орган ходимларининг қонуний талабига бўйсунмай, воқеа жойидан кетишга уринган. Шундан сўнг автомобилдаги болалар тушириб олинган. Ҳайдовчининг баланд овозда баҳслашгани оқибатида айрим болалар қўрқиб йиғлаб юборган.
Мазкур ҳолат юзасидан Йўл-патруль хизмати ходимлари томонидан ҳайдовчига нисбатан белгиланган тартибда маъмурий чора қўлланилган. Ҳайдовчи ўз изоҳида боғча болаларини ташишда йўловчи ташиш қоидаларини бузганини ҳамда болалар ҳаётини хавф остига қўйганини тан олган.
