Президент янги тайинланган хорижий элчиларни қабул қилди

 

28 июль куни ўтказилган тантанали маросимда давлат раҳбари Италия, Фаластин, Саудия Арабистони, Кувайт, Жазоир, Малайзия, Покистон, Озарбайжон ва Қозоғистоннинг фавқулодда ва мухтор элчиларидан ишонч ёрлиқларини қабул қилди.

 

Президент янги тайинланган дипломатларни Янги Ўзбекистондаги масъулиятли фаолияти бошлангани билан табриклаб, бугунги мураккаб геосиёсий вазиятда дипломатик мулоқот ва ҳамкорликнинг аҳамияти янада ортиб бораётганини таъкидлади.

 

Учрашув давомида ҳар бир давлат билан сиёсий, савдо-иқтисодий, инвестициявий ва маданий-гуманитар ҳамкорликни янада кенгайтириш истиқболлари муҳокама қилинди.

 

Давлат раҳбари Италия билан «яшил» энергетика, металлургия, кимё, қишлоқ хўжалиги, соғлиқни сақлаш, таълим ва туризм соҳаларидаги ҳамкорликни, Фаластин билан эса азалий дўстлик муносабатларини ривожлантириш муҳимлигини қайд этди.

 

Саудия Арабистони билан 25 миллиард долларлик инвестиция лойиҳалари портфели шакллангани, Кувайт билан инфратузилма, соғлиқни сақлаш ва таълим йўналишларида, Жазоир билан энергетика, тоғ-кон, қишлоқ хўжалиги ва туризм соҳаларида ҳамкорликни кенгайтириш бўйича катта салоҳият мавжудлиги таъкидланди.

 

Шунингдек, Малайзия билан яримўтказгичлар, ислом молияси ва зиёрат туризми, Покистон билан Трансафғон транспорт йўлаги, саноат кооперацияси ҳамда энергетика йўналишларидаги лойиҳалар, Озарбайжон билан инвестиция портфелини 10 миллиард долларга етказиш, Қозоғистон билан эса ўзаро савдо ҳажмини 10 миллиард долларга ошириш бўйича устувор вазифалар белгилаб олинди.

 

Маросим якунида Президент янги тайинланган элчиларга дипломатик фаолиятида муваффақият тилаб, Ўзбекистон ҳудудлари ва хусусий сектори билан фаол ҳамкорлик қилишга чақирди. Элчилар эса ўз навбатида мамлакатлар ўртасидаги кўп қиррали шерикликни янада ривожлантириш йўлида бор имкониятларини сафарбар этишларини билдирди.