“Золотая Корона” орқали пул ўтказмалари янги оператор орқали тикланади — Марказий банк
Марказий банк янги оператор орқали хизматлар келаси ҳафтадан қайта йўлга қўйилиши кутилаётганини маълум қилди.
Марказий банкнинг Валютани тартибга солиш ва назорат департаменти директори Отабек Тожиддиновнинг 29 июль куни бўлиб ўтган матбуот анжуманида маълум қилишича, Ўзбекистон тижорат банклари “Золотая Корона” раҳбарияти билан ҳамкорликда операцияларни ЕИ санкцияларига тушмаган бошқа банк орқали амалга ошириш юзасидан музокаралар олиб бормоқда.
Унинг айтишича, янги техник оператор орқали хизматларни келаси ҳафтадан бошлаб тиклаш режалаштирилган. Тожиддинов санкциялар “Золотая Корона” тизимининг ўзига эмас, балки операциялар амалга оширилган банкка нисбатан жорий этилганини таъкидлади.
Марказий банк маълумотига кўра, 2026 йилнинг биринчи ярмида Ўзбекистонга халқаро пул ўтказмалари ҳажми 9,3 миллиард долларни ташкил этган. Бу ўтган йилнинг мос даврига нисбатан 13 фоизга кўп. Шундан 2,4 миллиард доллари ёки қарийб 26 фоизи “Золотая Корона” тизими орқали амалга оширилган.
Тожиддиновнинг қайд этишича, мазкур хизматдан нафақат Россияда, балки Жанубий Корея, Туркия, Қозоғистон, Европа Иттифоқи давлатлари ва бошқа мамлакатларда меҳнат қилаётган Ўзбекистон фуқаролари ҳам фойдаланади. Унинг фикрича, юзага келган вазиятнинг мамлакатга бевосита таъсири сезиларли эмас ва операцияларни имкон қадар тезроқ тиклаш бўйича зарур чоралар кўрилмоқда.
Шунингдек, Марказий банк вакили санкциялар пул-кредит сиёсатига таъсир қилмаганини билдириб, ушбу омил асосий ставкани 14 фоиз даражасида сақлаб қолиш бўйича қарор қабул қилишда ҳисобга олинмаганини айтди. Чунки унинг истеъмол нархларига таъсири аҳамиятсиз деб баҳоланмоқда.
