Шавкат Мирзиёев Садир Жапаровни Ўзбекистонга таклиф этди

 

Қирғизистоннинг Чўлпонота шаҳридаги “Руҳ Ордо” маданият марказида Шавкат Мирзиёев ва Садир Жапаров иштирокида тор доирада ҳамда расмий делегациялар иштирокида музокаралар бўлиб ўтди.

 

Учрашувда Ўзбекистон–Қирғизистон ҳар томонлама стратегик шериклик муносабатларини янада ривожлантириш, савдо-иқтисодий, инвестициявий, транспорт-логистика, энергетика ва саноат кооперацияси соҳаларидаги ҳамкорликни кенгайтириш истиқболлари муҳокама қилинди.

 

Президент Шавкат Мирзиёев икки давлат ўртасидаги муносабатлар бугунги кунда тарихий юксак босқичга кўтарилганини таъкидлади. Сўнгги йилларда ўзаро товар айирбошлаш ҳажми қарийб 10 баробарга ошиб, 2025 йил якунларига кўра 1,2 миллиард долларга етгани, 450 та қўшма корхона фаолият юритаётгани қайд этилди.

 

Томонлар ўзаро савдо ҳажмини яқин йилларда 2 миллиард долларга етказиш, Тошкент ва Бишкекда савдо уйлари ҳамда ваколатхоналар очиш, энергетика, геология, қишлоқ хўжалиги, фармацевтика, тўқимачилик ва бошқа йўналишларда қўшма лойиҳаларни амалга оширишга келишиб олди.

 

Музокараларда Қамбарота ГЭС-1 қурилиши лойиҳаси, “Хитой – Қирғизистон – Ўзбекистон” темир йўли қурилиши, транспорт-логистика инфратузилмасини ривожлантириш ва рухсат бериш тартиб-таомилларини рақамлаштириш масалаларига алоҳида эътибор қаратилди.

 

Шунингдек, парламентлар, ҳукуматлар, ҳудудлар, ишбилармон доиралар ва экспертлар даражасидаги алоқаларни фаоллаштириш, Давлатлараро кенгаш тузиш ҳамда жорий йил якунига қадар барча вилоятлар иштирокида биринчи Ҳудудлар форумини ўтказиш бўйича келишувга эришилди.

 

Музокаралар якунида Президент Шавкат Мирзиёев Қирғизистон Президенти Садир Жапаровни ўзи учун қулай вақтда Ўзбекистонга ташриф билан келишга таклиф этди.