АҚШ Украинага 500 та Patriot ракетасини сотишга рухсат берди: битим 2,1 млрд долларга баҳоланмоқда
Келишув Канада, Норвегия ва Германия томонидан молиялаштирилади.
АҚШ Давлат департаменти Украинага 2,1 миллиард долларга яқин қийматдаги 500 та Patriot PAC-3 MSE ракетасини сотиш имкониятини маъқуллади. Бу ҳақда департаментнинг расмий баёнотида маълум қилинди.
Келишув Украина ҳукуматига Patriot Advanced Capability-3 (PAC-3) тизимлари учун Missile Segment Enhancement (MSE) модификациясидаги ракеталар ҳамда уларга тегишли ускуналарни сотишни назарда тутади.
Украина томонидан сўралган ҳарбий маҳсулотлар таркибига тахминан 500 та ракета, улар учун таснифланган ва таснифланмаган эҳтиёт қисмлар, шунингдек, логистика ва дастурий таъминот бўйича хизматлар киради.
АҚШ Давлат департаментининг таъкидлашича, келишув Канада, Норвегия ва Германия каби ҳамкор ва иттифоқчи давлатлар томонидан молиялаштирилади. Унда АҚШ бюджети маблағларидан фойдаланилмайди. Битимнинг тахминий қиймати 2,1 миллиард долларни ташкил этади.
Департамент баёнотида ушбу келишув ҳамкор давлат хавфсизлигини мустаҳкамлаш орқали АҚШнинг ташқи сиёсати ва миллий хавфсизлик мақсадларига хизмат қилиши қайд этилган.
Давлат департаменти қарори маъқулланганидан сўнг, келишув юзасидан АҚШ Конгрессига расмий билдиришнома юборилади. Конгрессга уни кўриб чиқиш учун 30 кун муддат берилади.
Аввалроқ, 16 октябрь куни The Washington Post нашри Украина расмийсига таяниб, мамлакатнинг ҳаво ҳужумидан мудофаа тизимлари учун тутувчи ракеталари захираси деярли тугаб бораётгани ҳақида хабар берган эди. Манбага кўра, май ойидан буён етказиб беришлар мунтазам бўлмаган ва Украина навбатдаги ракеталар етиб келишига шубҳа билан қараган.
Шунингдек, АҚШ президенти Дональд Трамп ўша куни мамлакат ўз арсеналини тўлдириш мақсадида иттифоқчиларга ўқ-дорилар сотишни тўхтатганини билдирган эди.
