Green Card бўйича янги қарор: рўйхатдан ўтишни қайта бошлаш вақтинча тўхтатилди

АҚШнинг Тўққизинчи округ апелляция суди 2027 йилги Green Card лотереясини қайта бошлашни талаб қилган қуйи суд қарорининг ижросини вақтинча тўхтатди. Шу сабабли лотерея учун рўйхатдан ўтиш ҳозирча бошланмайди. Бу ҳақда Bloomberg Law хабар берди.

 

14 октябрь куни Калифорния жанубий округи федерал суди АҚШ Давлат департаментига 29 октябргача 2027 йилги Diversity Visa дастури бўйича рўйхатдан ўтиш саналарини эълон қилишни, 1 ноябргача эса аризалар қабул қилишни бошлашни буюрган эди.

 

Бироқ Трамп маъмурияти ушбу қарор устидан апелляция шикояти киритди. 29 октябрь куни Тўққизинчи округ апелляция суди ҳукуматнинг талабини қаноатлантириб, қуйи суд қарорини вақтинча тўхтатди.

 

Суд қарорида Red Eagle Law юридик компаниясининг мазкур масала бўйича даъво киритиш ҳуқуқига эга эмаслиги қайд этилган. Компания август ойида АҚШ Давлат департаментини 2027 йилги Green Card лотереяси учун рўйхатдан ўтишни ўз вақтида бошламаганликда айблаб, судга мурожаат қилган эди.

 

Судья Н. Ренди Смит алоҳида хулосасида компаниянинг АҚШ Конституциясига мувофиқ ҳам ушбу масала юзасидан судга мурожаат қилиш ҳуқуқи йўқлигини таъкидлаган.

 

Эслатиб ўтамиз, Трамп маъмурияти 2025 йил декабрь ойида Diversity Visa дастурини тўхтатган эди. Бунга дастур орқали АҚШга келган Португалия фуқаросининг Род-Айленд ва Массачусетс штатларидаги икки алоҳида отишмада бир неча кишини ўлдиришда гумон қилингани сабаб бўлган. Кейинчалик гумонланувчи ўз жонига қасд қилган ҳолда топилган.