Германия ва Украина жанговар робот ишлаб чиқди: у фронтда ҳарбийлар ўрнига жанг қилиши мумкин
Техниканинг дастлабки намуналари йил охиригача Украина армиясига етказилиши режалаштирилган.
Германия ва Украина компаниялари учувчисиз GEREON робот-танкини масофадан бошқариладиган SABER қуролли модули билан муваффақиятли бирлаштирди. Янги роботлаштирилган техниканинг дастлабки намуналари 2026 йил охиригача Украина армиясига етказилиши режалаштирилган. Бу ҳақда Euronews хабар берди.
Лойиҳа Германиянинг ARX Robotics ва Украинанинг ROBONEERS компаниялари ҳамкорлигида амалга оширилмоқда. Ҳамкорлик тўғрисидаги битим 4 октябрь куни Германия канцлери Фридрих Мерцнинг Киевга ташрифи чоғида, Украина президенти Владимир Зеленский иштирокида имзоланган.
Гусеницали GEREON платформаси ҳаракатланиш, электр таъминоти ва камералар ҳамда сенсорлар ёрдамида разведка олиб бориш вазифаларини бажаради. Унга ўрнатиладиган SABER модули эса турли қуроллар билан жиҳозланиши мумкин. Бу ҳарбийларга жанговар ҳаракатларни масофадан туриб олиб бориш имконини беради.
GEREON роботлари Украинада ўқ-дорилар ва бошқа юкларни ташиш, ярадорларни эвакуация қилиш, радиоалоқага халақит бериш ҳамда душман дронларига қарши курашиш каби вазифаларда қўлланмоқда. Платформани бажариладиган вазифага қараб қайта жиҳозлаш мумкин. SABER модулига эса милтиқ ва гранатомёт каби қуроллар ўрнатилади.
Компаниялар Rys Pro номли транспорт роботини ишлаб чиқаришни ҳам кенгайтирмоқда. Бунинг учун қўшма корхона ташкил этилган. Биринчи йил давомида Германия ва Украинада 1 000 дан ортиқ шундай робот ишлаб чиқариш ва етказиб бериш режалаштирилган.
Шу билан бирга, Германия мудофаа вазири Борис Писториус Мюнхендаги Helsing технологик компаниясига ташриф буюрмоқда. Ташриф давомида компаниянинг сунъий интеллект соҳасидаги янги ишланмалари ва имкониятлари тақдим этилиши кутилмоқда.
2021 йилда ташкил этилган Helsing мудофаа саноати учун сунъий интеллект ва дастурий таъминот ишлаб чиқади. Компания танклар, сувости кемалари ва жанговар самолётлар каби ҳарбий техникаларни сунъий интеллект тизимлари билан жиҳозлайди.
Унинг асосий буюртмачилари орасида Германия қуролли кучлари — Бундесвер, шунингдек, Франция ва Буюк Британия бор. Helsing ишлаб чиқарган HX-2 каби дронлар ва сунъий интеллект тизимлари Украинада ҳам қўлланмоқда.
