Лавров билан суратга тушишдан бош тортишди: G20 учрашувида жамоавий фотосессия бекор қилинди
G20 учрашувида бир нечта расмийлар Россия ташқи ишлар вазири билан суратга тушишни истамади.
АҚШнинг Атланта шаҳрида бўлиб ўтган G20 ташқи ишлар вазирлари учрашувида анъанавий жамоавий суратга олиш бекор қилинди. Бунга бир нечта иштирокчининг Россия ташқи ишлар вазири Сергей Лавров билан бирга суратга тушишни истамагани сабаб бўлган. Бу ҳақда CBC хабар берди.
Манбаларга кўра, учрашув иштирокчиларининг қарийб учдан бир қисми Лавров билан умумий суратга тушишга қарши чиққан. Европалик расмийлар Россия вазири иштирокидаги ва у қатнашмайдиган иккита алоҳида суратга тушишни таклиф қилган. Бироқ АҚШ томони эҳтимолий келишмовчиликларнинг олдини олиш мақсадида фотосессияни бутунлай бекор қилган.
Германия ташқи ишлар вазири Ёханн Вадефул Атлантада журналистларга Россия билан одатдагидек муносабатларни давом эттириш мумкин эмаслигини айтган. Унинг таъкидлашича, мавжуд келишмовчиликлар музокаралар столида муҳокама қилиниши керак, шу билан бирга нотўғри таассурот уйғотадиган тасвирлардан ҳам қочиш лозим.
Аввалроқ Вадефул Лавров билан жамоавий суратга тушишдан бош тортмаслигини билдирган эди. У Берлин ва Москва ўртасида нормал муносабатлар мавжуд эмаслигини тан олган бўлсада, бундай учрашувларда қўшма суратга тушиш одатий протокол эканини таъкидлаган.
