Хавфсизлик таҳдиди кучайди: АҚШ айрим давлат хизматчиларига Саудия Арабистонини тарк этишни буюрди
Элчихона бунга ҳусийларнинг фуқаролик аэропортлари ва муҳим инфратузилмага ҳужумларини сабаб қилиб кўрсатган.
АҚШ ҳукумати хавфсизлик таҳдидлари сабаб Саудия Арабистонидаги фавқулодда вазифаларни бажармайдиган давлат хизматчилари ва уларнинг оила аъзоларига мамлакатни тарк этиш бўйича кўрсатма берди. Бу ҳақда Reuters агентлиги Ар-Риёддаги АҚШ элчихонаси баёнотига таяниб хабар берди.
Элчихона қарорга асос сифатида Ямандаги ҳусийлар ҳаракатининг фуқаролик аэропортлари ва бошқа муҳим инфратузилма объектларига уюштираётган ҳужумларини келтирган.
Шунингдек, АҚШ ҳукумати ходимлари Саудия Арабистони аэропортларидан фойдаланиш учун эндиликда махсус рухсат олиши кераклиги маълум қилинган.
Дипломатик миссия АҚШ фуқароларини ҳам эҳтимолий хавфсизлик хатарлари ҳақида огоҳлантирди. Жумладан, кейинги ҳужумлар, ҳаво ҳудудининг ёпилиши, авиарейсларнинг бекор қилиниши ва сафарлардаги бошқа узилишлар юз бериши мумкинлиги қайд этилган.
Reuters хабарига кўра, АҚШ давлат хизматчилари ва уларнинг оила аъзоларига Саудия Арабистонини тарк этиш тавсияси 23 октябрдан бошлаб берилган.
Саудия Арабистони ва Ямандаги ҳусийлар ўртасидаги зиддият сўнгги ойларда кучайган. Ҳусийлар Саудия Арабистонидаги аэропортлар, энергетика объектлари ва бошқа муҳим инфратузилмаларга ҳужумлар уюштирганини билдирган.
