Ўзбекистон Президентини расмий кутиб олиш маросими бўлиб ўтди
Чўлпонотада ўтган расмий маросимдан сўнг олий даражадаги музокаралар бошланди.
Қирғиз Республикасига давлат ташрифи билан борган Президент Шавкат Мирзиёевни Чўлпонота шаҳридаги Чингиз Айтматов номидаги “Руҳ Ордо” маданият марказида расмий кутиб олиш маросими бўлиб ўтди.
Маросимда олий мартабали меҳмон шарафига фахрий қоровул саф тортди, Ўзбекистон ва Қирғизистон давлат мадҳиялари янгради.
Президентлар Шавкат Мирзиёев ва Садир Жапаров фахрий қоровул сафи олдидан ўтиб, икки мамлакат расмий делегациялари аъзоларини бир-бирига таништирди.
Расмий кутиб олиш маросимидан сўнг давлат раҳбарлари биргаликда суратга тушди ва олий даражадаги икки томонлама музокараларни бошлади.
