Damas'да 28 нафар бола ташиган ҳайдовчига жарима бали ёзилди
Болаларнинг беш нафари автомобилнинг олд ўриндиғида жойлаштирилган бўлган.
Фарғона вилоятининг Тошлоқ туманида ўтказилган рейд давомида Damas русумидаги автомобилда 20 нафардан ортиқ бола ноқонуний равишда ташилаётгани аниқланди. Бу ҳақда ЙҲХХ хабар берди.
Маълум қилинишича, Тошлоқ туманининг Турват маҳалла фуқаролар йиғини ҳудудида Йўл ҳаракати хавфсизлиги ходимлари томонидан тўхтатилган Damas автомашинасида 28 нафар вояга етмаган йўловчи олиб кетилаётган бўлган.
Қайд этилишича, болаларнинг беш нафари автомобилнинг олд ўриндиғида жойлаштирилган бўлган. Бу эса йўл ҳаракати хавфсизлиги талабларига зид ҳисобланади.
Ҳолат юзасидан ҳайдовчига нисбатан Маъмурий жавобгарлик тўғрисидаги кодекснинг 128¹⁸-моддаси асосида маъмурий баённома расмийлаштирилди ҳамда унинг ҳисобига 0,3 жарима бали ёзилди.
Масъуллар ота-оналарни фарзандларини белгиланган меъёрлардан ортиқ йўловчи ташиётган транспорт воситаларига чиқармасликка чақириб, бундай ҳолатлар болалар ҳаёти ва хавфсизлиги учун жиддий хавф туғдиришини таъкидлади.
