Иссиқкўлда Марказий Осиёда илк бор F1H2O жаҳон чемпионати босқичи бошланди
Очилиш маросимида Марказий Осиё ва Озарбайжон давлат раҳбарлари иштирок этди.
Марказий Осиё ва Озарбайжон давлат раҳбарлари Иссиқкўлда сув-мотор спорти бўйича Қирғизистон Гран-присининг тантанали очилиш маросимида иштирок этди.
Норасмий Маслаҳат учрашуви дастури доирасида ўтказилган тадбирда Ўзбекистон Президенти Шавкат Мирзиёев рафиқаси билан бирга спортчиларнинг саралаш пойгасини кузатди.
Мусобақа Халқаро сув-мотор спорти иттифоқи шафелигида ўтказилаётган ва “сувдаги Формула-1” номи билан машҳур F1H2O жаҳон чемпионатининг иккинчи босқичи ҳисобланади.
Қирғизистон Гран-приси Марказий Осиёда илк бор мезбонлик қилаётган F1H2O жаҳон чемпионати босқичи бўлиб, унда дунёнинг турли мамлакатларидан профессионал жамоалар ва спортчилар иштирок этмоқда.
Мусобақа дастуридан спортчиларнинг машғулотлари, саралаш баҳслари ҳамда соатига 220 километрдан ортиқ тезликда ҳаракатланувчи тезюрар қайиқлар иштирокидаги асосий пойга ўрин олган.
