Япониядa ноқонуний яшаган икки нафар Ўзбекистон фуқароси депортация қилинди
Расмийлар хорижликларни виза муддатига қатъий риоя қилишга чақириб, ноқонуний яшаш ва ишлаш жиддий ҳуқуқий оқибатларга олиб келиши ҳақида огоҳлантирди.
Япония Иммиграция хизмати агентлиги мамлакатда ноқонуний яшаб келган икки нафар Ўзбекистон фуқаросини Ўзбекистонга депортация қилди.
Маълум қилинишича, ҳар икки фуқаро Японияга қисқа муддатли виза асосида кирган, бироқ виза муддати тугаганидан кейин ҳам мамлакатни тарк этмаган. Шундан сўнг улар Япония ҳуқуқни муҳофаза қилувчи органлари томонидан ушланиб, депортация қилинган.
Агентликнинг таъкидлашича, ноқонуний яшаш ёки ишлаш ҳолатлари аниқланган тақдирда шахслар ҳибсга олиниши, иммиграция муассасаларига жойлаштирилиши ҳамда депортация қилиниши мумкин.
Шунингдек, Япония ҳукумати қонунбузарлик содир этган хорижий фуқаролар ҳақидаги маълумотларни уларнинг ватани ҳукуматига ҳам тақдим этади. Шу сабабли, бундай шахсларга нисбатан Ўзбекистонга қайтгач ҳам амалдаги қонунчилик доирасида тегишли чоралар кўрилиши мумкинлиги қайд этилди.
Расмийлар фуқароларни "Японияда ишлаш мумкин" каби асоссиз ва ноқонуний таклифларга ишонмасликка чақирди. Бундан ташқари, Япония Иммиграция хизмати қочқин мақомини олиш учун ариза бериш орқали мамлакатда узоқ муддат қолиш ёки ишлаш мумкинлиги ҳақидаги даъволар ҳақиқатга тўғри келмаслигини билдирди.
Қайд этилишича, бундай мақсадларда берилган аризалар рад этилиши, ариза берувчи эса иммиграция муассасасига жойлаштирилиши ёки депортация қилиниши мумкин.
Агентлик, шунингдек, сохта маълумотлар тақдим этиш ёки ноқонуний усуллар билан қочқин мақомини олишга уриниш жиддий ҳуқуқий жавобгарликка сабаб бўлишидан огоҳлантирди.
