Россияда давлат байроғини таҳқирлашда гумонланган ўзбекистонлик аёл ватанга қайтарилади
Миграция агентлиги Россиянинг Нижний Новгород вилоятидаги ҳолат юзасидан муносабат билдирди.
Россиянинг Нижний Новгород вилоятида ҳуқуқни муҳофаза қилувчи органлар томонидан ўтказилган назорат тадбирлари вақтида Ўзбекистон фуқаролари иштирок этгани акс этган видеолар ижтимоий тармоқларда тарқалди.
Хабарларга кўра, вилоятда ўтказилган рейд давомида полиция ерда ётган Россия байроғи туширилган пойандозни кўриб қолган. Мазкур ҳолат бўйича аёлга нисбатан “Россия давлат байроғини таҳқирлаш” моддаси бўйича жиноий иш қўзғатиш масаласи кўриб чиқилаётган эди. Ҳолат юзасидан Миграция агентлиги расмий муносабат билдирди.
Агентлик маълум қилишича, мазкур ҳолат зудлик билан назоратга олинган. Россиядаги ваколатхона ҳамда Ўзбекистоннинг Қозон шаҳридаги Бош консулхонаси Россиянинг тегишли давлат органлари билан ҳамкорликда воқеа тафсилотларига аниқлик киритиш ва Ўзбекистон фуқароларининг ҳуқуқ ҳамда қонуний манфаатларини таъминлаш бўйича иш олиб бормоқда.
Шунингдек, видеода акс этган Ўзбекистон фуқароси М.С. билан алоқа ўрнатилгани билдирилди. Унга консуллик-ҳуқуқий ёрдам кўрсатилмоқда.
Маълум қилинишича, Миграция жамғармаси маблағлари ҳисобидан фуқаронинг Ўзбекистонга қайтиши учун авиачипта расмийлаштирилган. Унинг 6 август куни Ўзбекистонга қайтиши режалаштирилган.
