Газ етиб бормаган ҳудудларда электр энергияси учун чегирма берилиши мумкин
Энергетика вазирига кўра, бу бўйича ҳудудларнинг хусусиятлари ва энергоресурслар билан таъминланганлик даражасини ҳисобга олган ҳолда янги тарифлаш тизими ишлаб чиқилмоқда.
Ўзбекистонда табиий газ таъминоти мавжуд бўлмаган ҳудудларда яшовчи аҳоли учун электр энергияси тарифларини дифференсиаллаштириш режалаштирилмоқда. Бу ҳақда энергетика вазири Шерзод Ходжаев “Ўзбекистон 24” телеканалига берган интервьюсида маълум қилди.
Вазирнинг айтишича, айни пайтда мамлакатда қарийб 2 мингта маҳаллага табиий газ етказиб берилмаган. Шу сабабли мазкур ҳудудлардаги аҳоли уйларини электр энергияси орқали иситмоқда, аммо амалдаги тарифлар бўйича тўлов қилаётгани қайд этилди.
Шерзод Ходжаевнинг сўзларига кўра, Президент топшириғига асосан электр энергияси учун тариф сиёсатини ҳудудларнинг ўзига хос хусусиятларидан келиб чиққан ҳолда қайта кўриб чиқиш режалаштирилган. Янги тизимда кўп қаватли ва якка тартибдаги уй-жойлар, шунингдек, аҳоли яшаш ҳудудларининг газ ва бошқа энергоресурслар билан таъминланганлик даражаси инобатга олинади.
“Табиий газ етиб бормагани учун иситишда электр энергиясидан фойдаланаётган истеъмолчининг чегирма олишга ҳаққи бор”, — деди вазир.
Маълумот учун, газ таъминоти мавжуд бўлмаган уйлар учун электр энергияси тарифларига енгиллик бериш ташаббуси аввал ҳам билдирилган. Собиқ энергетика вазири Жўрабек Мирзамаҳмудов 2024 йил кузида бу бўйича қарор лойиҳаси ишлаб чиқилаётганини ва уни 2025 йилдан жорий этиш режалаштирилганини маълум қилган эди.
