Фавқулодда вазият қурбонлари ва жабрланганларга моддий ёрдам: тўлов миқдорлари белгиланди
Авария, ёнғин, портлаш ва бошқа техноген фавқулодда вазиятлардан зарар кўрган фуқаролар 30 кун ичида тегишли комиссияга мурожаат қилиши керак.
Ўзбекистонда техноген хусусиятли фавқулодда вазиятлар оқибатида аҳолига етказилган зарарни баҳолаш ва қоплаш тартиби белгиланди. Бу ҳақда Ҳукуматнинг 606-сон қарори (2026 йил 3 ноябрь) билан тегишли низом тасдиқланди.
Низомга кўра, техноген хусусиятли фавқулодда вазиятларга транспорт авариялари ва ҳалокатлари, кимёвий хавфли ҳамда ёнғин-портлаш хавфи мавжуд объектлардаги ҳодисалар, энергетика ва коммунал тизимлардаги авариялар, бино конструкцияларининг тўсатдан бузилиши ва бошқа ҳолатлар киради.
Жабрланганларга етказилган зарар тегишли туман ёки шаҳар ҳокимлиги ҳузуридаги махсус жамғарма маблағлари ҳисобидан қуйидаги ҳолатларда қоплаб берилади:
-
суд томонидан фавқулодда вазият учун айбдор шахслар аниқлангунига қадар;
-
айбдор деб топилган юридик шахслар ёки уларнинг мансабдор шахслари белгиланган муддатда зарарни тўлиқ қоплаш имконига эга бўлмаган ҳолларда.
Жабрланганлар фавқулодда вазият юз берган кундан бошлаб 30 кун ичида белгиланган шаклдаги аризани тўлдириб, тегишли комиссияга топшириши лозим.
Комиссия далолатномасига мувофиқ, Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимларининг қарорлари асосида қуйидаги миқдорларда бир марталик моддий ёрдам тўланади:
-
фавқулодда вазият оқибатида ҳалок бўлган фуқароларнинг оила аъзоларига (турмуш ўртоғи, фарзандлари, ота-оналари ва қарамоғидаги шахслар) — ҳар бир оила аъзосига тенг улушда БҲМнинг 500 бараваригача;
-
оғир тан жароҳати олган фуқароларга — БҲМнинг 200 бараваригача;
-
ўртача оғирликдаги тан жароҳати олган фуқароларга — БҲМнинг 150 бараваригача;
-
енгил тан жароҳати олган фуқароларга — БҲМнинг 100 бараваригача.
