Белгиланган меъёр бузилди: Тошкент аэропортида 1 млрд сўмлик заргарлик буюмлари топилди
Аэропортда хориждан келган йўловчиларнинг юклари ва шахсий буюмлари текширилганда, жами 691 грамм заргарлик буюмлари аниқланди.
Тошкент халқаро аэропортида заргарлик буюмларини белгиланган меъёрлардан ортиқ миқдорда ноқонуний олиб киришга уриниш билан боғлиқ бир нечта ҳолат аниқланди. Бу ҳақда «Тошкент-АЭРО» ихтисослаштирилган божхона комплекси матбуот хизмати хабар берди.
Сўнгги кунларда Ислом Каримов номидаги Тошкент халқаро аэропорти чегара божхона пости ходимлари томонидан турли хорижий йўналишлардан учиб келган йўловчиларнинг юклари ва шахсий буюмлари текширилган.
Текширувлар давомида божхона назоратига белгиланган тартибда тақдим этилмаган, умумий оғирлиги қарийб 691 грамм бўлган сариқ рангли металлдан ясалган заргарлик буюмлари аниқланган.
Топилган буюмларнинг дастлабки қиймати жами 1 миллиард 20 миллион 600 минг сўмга баҳоланган.
Ҳозирда мазкур ҳолатлар юзасидан божхона текширувлари давом эттирилмоқда.
