51 туп дарахт кесилди, 5 млрд сўмдан ортиқ компенсация ҳисобланди: қурилиш компаниясига чора кўрилди
Шунингдек, 396 млн сўмлик зарарни қоплаш ва 5 100 туп кўчат экиш мажбурияти юклатилди.
Тошкент шаҳрининг Яшнобод туманида кўп қаватли турар жой мажмуасини қураётган «B..D.» МЧЖ фаолиятида экологик қонунчилик талабларини бузиш ҳолатлари аниқланди. Бу ҳақда Экология ва иқлим ўзгариши миллий қўмитаси хабар берди.
Экополиция ходимлари Жарқўрғон кўчасидаги қурилиш майдонини ўрганган. Текширув давомида объектнинг ҳар бир босқичи учун давлат экологик экспертизасининг ижобий хулосаси олинган бўлсада, уларда белгиланган талабларнинг аксарияти бажарилмагани маълум бўлган.
Хусусан, қурилиш майдонига кириш-чиқиш жойларида юк автомобиллари ғилдиракларини ювиш учун блок-постлар ташкил этилмаган. Натижада лой ва тупроқ Жарқўрғон кўчаси бўйлаб 2–2,5 километр масофага ёйилган. Тупроқ қуригач, автомобиллар ҳаракати сабаб ҳавога чанг кўтарилган. Атмосфера ҳавосини муҳофаза қилиш бўйича зарур чоралар ҳам ишлаб чиқилмаган.
Шунингдек, эски биноларни бузишдан ҳосил бўлган 126 188,9 тонна чиқинди ва котлован қазишдан чиққан 368 432 тонна тупроқ қаерга олиб кетилгани юзасидан корхона ҳеч қандай ҳужжат тақдим этмаган. Мутахассислар ўлчовларига кўра, ҳудудда 12 036 тонна қаттиқ маиший ва қурилиш чиқиндиси белгиланмаган жойга тўпланган. Чиқиндиларни олиб чиқиш ва оқова сувларни ташиш бўйича шартномалар ҳам тузилмаган.
Бундан ташқари, корхона томонидан 51 туп дарахт — 50 туп арча ва 1 туп чинор ноқонуний кесилгани аниқланган. Корхона уларни кесиш учун ариза берган, бироқ Тошкент шаҳар экология бош бошқармаси рухсат бермаган.
Текширувда “Яшил макон” дастури доирасида ҳудуднинг камида 25 фоизини кўкаламзорлаштириш, углерод нейтраллиги режасини ишлаб чиқиш каби мажбуриятлар ҳам бажарилмагани қайд этилган.
Аниқланган қоидабузарликлар юзасидан корхонага:
-
атроф-муҳитни ифлослантирганлик ва чиқиндиларни ноқонуний жойлаштирганлик учун 5 млрд 183 млн 364 минг 476 сўм компенсация тўлови;
-
кесилган дарахтлар учун ўсимлик дунёсига етказилган 396 млн сўм зарарни қоплаш мажбурияти юклатилди.
Шунингдек, кесилган ҳар бир дарахт ўрнига 100 тупдан, жами 5 100 туп, камида уч йиллик кўчат экиш ва уларни уч йил давомида парваришлаш белгиланди.
Корхона раҳбарига Маъмурий жавобгарлик тўғрисидаги кодекснинг 85¹-моддаси 1-қисми бўйича 4 млн 400 минг сўм жарима қўлланилди.
Бундан ташқари, корхонага чанг кўтарилишининг олдини олиш, ҳудуддаги чиқиндиларни ўлчаб, олиб чиқиш ва қайта ишлашга топшириш, шунингдек, “Экологик оқибатлар тўғрисидаги баёнот” лойиҳасини 10 декабргача экспертизадан ўтказиш бўйича кўрсатмалар берилди.
