Чиптасиз юриш ҳолатлари кўпайди: 6 кунда 2 152 та баённома расмийлаштирилди
Тошкентда 8 та автобус йўналиши назоратга олинди.
Тошкент шаҳрида жамоат транспортида йўл ҳақини тўлаш интизомини мустаҳкамлаш мақсадида назорат тадбирлари кучайтирилди. Хусусан, пойтахтдаги 42, 56, 74, 84, 120, 169, 174 ва 177-сонли автобус йўналишлари алоҳида назоратга олинди. Бу ҳақда Транспорт вазирлиги матбуот хизмати хабар берди.
2026 йил 28 октябрдан 2 ноябрга қадар ўтказилган текширувлар давомида йўл ҳақини тўламаган йўловчиларга нисбатан Маъмурий жавобгарлик тўғрисидаги кодекснинг 144-моддаси 5-қисмига асосан 2 152 та маъмурий баённома расмийлаштирилди.
Қоидабузарликлар энг кўп қуйидаги йўналишларда қайд этилган:
-
174-йўналишда — 291 та;
-
120-йўналишда — 286 та;
-
56-йўналишда — 284 та;
-
169-йўналишда — 284 та.
Назорат даврида айрим йўналишларда йўловчилар оқими ҳам ошган. Жумладан, 2 ноябрь куни 28 октябрга нисбатан 174-йўналишда ташилган йўловчилар сони 1 692 нафарга ёки 32,4 фоизга, 56-йўналишда эса 1 256 нафарга ёки 13,9 фоизга кўпайган.
Маълум қилинишича, олти кун давомида мазкур саккизта йўналишда жами 326 453 нафар йўловчи ташилган ва 6 501 та қатнов амалга оширилган.
