Тошкентда кўп қаватли уйда газ чақнаши юз берди: бир киши жароҳатланди
Ҳодиса оқибатида қўшни хонадоннинг эшик ва деразаларига зарар етган.
2026 йил 5 ноябрь куни соат 10:00 да Тошкент шаҳри Учтепа тумани Чилонзор-23 даҳасидаги кўп қаватли уй хонадонларидан бирида ҳаво-газ аралашмаси чақнаши юз берди. Бу ҳақда Тошкент шаҳар Фавқулодда вазиятлар бош бошқармаси хабар берди.
Хабар келиб тушгач, қутқарув бўлинмалари зудлик билан воқеа жойига етиб борган.
Ҳодиса оқибатида қўшни хонадоннинг эшик ва деразаларига қисман зарар етган. Бир нафар фуқаро тан жароҳати олиб, малакали тиббий ёрдам кўрсатиш учун шифохонага ётқизилган.
Маълум қилинишича, ҳодиса оқибатида ҳалок бўлганлар йўқ.
Ҳозирда чақнашнинг келиб чиқиш сабаблари ва етказилган зарар миқдори аниқланмоқда.
