Тошкентда маст йигит кекса аёлга нисбатан уятсиз ҳаракат содир этганликда гумонланмоқда
Ҳолат юзасидан унга нисбатан маъмурий баённома расмийлаштирилиб, иш судга юборилди.
Ижтимоий тармоқларда номаълум шахснинг кекса аёлга нисбатан ножўя ҳаракатлар содир этгани акс этган хабар кенг муҳокамаларга сабаб бўлди. Ҳолат юзасидан Тошкент шаҳар Ички ишлар бош бошқармаси расмий маълумот берди.
Маълум қилинишича, 2026 йил 4 август куни соат 05:30 атрофида Яшнобод тумани Ширинобод маҳалласи ҳудудида 2004 йилда туғилган М.Х. маст ҳолатда кекса аёлга нисбатан уятсиз бузуқ ҳаракат содир этган. Воқеадан сўнг у ҳодиса жойидан кетишга уринган, бироқ фуқаролар томонидан ушланиб, ички ишлар органлари ходимларига топширилган.
Ҳолат юзасидан Яшнобод тумани ИИО ФМБ томонидан М.Х.га нисбатан Маъмурий жавобгарлик тўғрисидаги кодекснинг 183-моддаси (майда безорилик), 187-моддаси (жамоат жойларида алкоголь маҳсулотини истеъмол қилиш) ҳамда 194-моддаси (ички ишлар органи ходимининг қонуний талабини бажармаслик) аломатлари билан маъмурий баённома расмийлаштирилди.
Тўпланган ҳужжатлар қонуний чора кўрилиши учун Жиноят ишлари бўйича Яшнобод туман судига юборилган.
