Россия байроғи туширилган пойандоз иши: ўзбекистонлик аёлга жиноят иши қўзғатиш рад этилди
Қозондаги Бош консулхона маълум қилишича, бунга Россия ваколатли идоралари билан олиб борилган музокаралар натижасида эришилган.
Россиянинг Нижний Новгород вилоятида Россия давлат байроғи тасвири туширилган пойандоз билан боғлиқ ҳолатда текширилган Ўзбекистон фуқароси М.С.га нисбатан жиноят иши қўзғатилмайди. Бу ҳақда Ўзбекистоннинг Қозон шаҳридаги Бош консулхонаси маълум қилди.
Маълум қилинишича, аввал мазкур ҳолат юзасидан Бош консулхона томонидан тегишли консуллик-ҳуқуқий чоралар кўрилиб, Россиянинг ваколатли идоралари билан дипломатик каналлар орқали музокаралар олиб борилган.
Натижада Россия Ташқи ишлар вазирлигининг Нижний Новгород шаҳридаги ваколатхонаси билан ҳамкорликда М.С.га нисбатан Россия Федерацияси Жиноят кодексининг 329-моддаси (давлат рамзларини таҳқирлаш) бўйича жиноят иши қўзғатишни рад этиш тўғрисида қарор қабул қилинган.
Шунингдек, миграция қонунчилигига мувофиқ фуқаронинг Ўзбекистонга қайтиши билан боғлиқ зарур тартиб-таомиллар амалга оширилмоқда. Унинг Ватанга қайтиши 2026 йил 6 августга белгиланган.
Бош консулхона Ўзбекистон фуқароларининг ҳуқуқ ва қонуний манфаатларини ҳимоя қилиш бўйича зарур консуллик-ҳуқуқий чораларни кўришда давом этишини билдирди.
