Олмалиқда Мис бойитиш фабрикасининг магистраль қувури ёрилди
Ҳолат юзасидан экологик текширув ўтказилиб, лаборатория таҳлиллари бошланган.
Олмалиқ кон-металлургия комбинатига қарашли Мис бойитиш фабрикасининг Чиқинди сақлаш омборига олиб борувчи магистраль қувурида ёрилиш юз берди. Ҳолат акс этган видеолар ижтимоий тармоқларда тарқалди.
ОКМК матбуот хизматининг маълум қилишича, ҳодиса 5 август куни соат 11:55 да содир бўлган. Қувурдаги носозлик комбинат мутахассислари томонидан тезкор равишда бартараф этилиб, таъмирлаш ишлари якунланган.
Воқеа юзасидан Тошкент вилояти Экология ва иқлим ўзгариши бош бошқармаси мутахассислари ҳам ўрганиш олиб борган. Бошқарманинг Атроф-муҳит мониторинги, иқлим ўзгариши ва чўлланишга қарши курашиш бўлими (таҳлилий лаборатория) ходимлари ҳодиса содир бўлган ҳудуддан таҳлил учун намуналар олган.
Маълум қилинишича, лаборатория таҳлиллари якунига кўра, аниқланган ҳолат бўйича амалдаги қонунчиликка мувофиқ тегишли чоралар кўрилади.
