Янгийўл тажрибаси асосида 13 туманда янги энергетика тизими йўлга қўйилади
Янгийўл туманида электр ва газ таъминотини яхшилаш бўйича махсус штаб фаолият юритмоқда.
Президент Шавкат Мирзиёевга энергетика тармоғида белгиланган вазифалар ижроси ҳамда куз-қиш мавсумига тайёргарлик ишлари юзасидан ахборот берилди.
Таъкидланишича, 27 июль куни ўтказилган видеоселектор йиғилишида электр ва газ таъминоти барқарорлиги, авариялар ва энергия йўқотишларини қисқартириш, соҳада бошқарувни такомиллаштириш бўйича қатор вазифалар белгиланган эди. Тақдимотда ушбу топшириқлар ижроси ва келгусидаги режалар кўриб чиқилди.
Маълум қилинишича, ҳозирда Янгийўл туманида электр ва газ таъминотини яхшилаш бўйича махсус штаб фаолият юритмоқда. Ушбу тажриба асосида яна 13 та туманда ҳам шундай тизимни йўлга қўйиш, кейинчалик эса уни бошқа ҳудудларга татбиқ этиш режалаштирилган.
Шунингдек, тадбиркорларни электр ва газ тармоқларига улашда техник шартларни расмийлаштириш жараёнларининг шаффофлигини таъминлаш ва коррупсиявий ҳолатларнинг олдини олиш чоралари кучайтирилмоқда.
Куз-қиш мавсумига тайёргарлик доирасида муаммоли тармоқлар ва ускуналарни янгилаш, энергия йўқотишларини камайтириш, авариявий узилишлар сабабларини бартараф этиш ҳамда энергия самарадорлигини ошириш ишлари олиб борилаётгани қайд этилди.
Президент Энергетика вазирлигига тармоқда ягона ва самарали бошқарув тизимини шакллантириш, инвестиция лойиҳаларини ўз вақтида амалга ошириш ва куз-қиш мавсумига тайёргарликни тизимли ташкил этиш бўйича топшириқлар берди.
Бундан ташқари, “Ҳудудий электр тармоқлари” АЖга электр таъминоти барқарорлигини ошириш ва инфратузилмани модернизация қилиш, Ўзенергоинспексияга эса энергия ресурсларидан оқилона фойдаланиш устидан назоратни кучайтириш, йўқотишларни қисқартириш ҳамда йирик истеъмолчиларни энергия аудитидан ўтказишни жадаллаштириш вазифалари юклатилди.
Давлат раҳбари барча чораларни манзилли ва аниқ ҳисоб-китоблар асосида амалга ошириш, аҳоли ҳамда иқтисодиёт тармоқларини электр ва газ билан барқарор таъминлаш зарурлигини таъкидлади.
