Қашқадарёда янги қурилаётган кўприк балкаси қулаб тушди
Монтаж жараёнида краннинг бир томони олдин кўтарилгани сабаб балкага ортиқча юк тушиб, унинг синишига олиб келган. Ҳодиса оқибатида ҳеч ким жабрланмаган.
Қашқадарё вилояти Деҳқонобод туманида қурилаётган кўприк балкаси бир томонга оғиб кетгани акс этган видео ижтимоий тармоқларда тарқалди. Автомобиль йўллари давлат қўмитаси ҳолат юзасидан “Дарё”га изоҳ берди.
Маълум қилинишича, ҳодиса 6 август куни Ислом тараққиёт банки ва ОПЕК жамғармаси иштирокидаги М-39 Олмаота—Бишкек—Тошкент—Шаҳрисабз—Термиз автомобиль йўлининг 1255–1315-километр қисмини реконструкция қилиш лойиҳаси доирасидаги қурилиш-монтаж ишлари вақтида юз берган.
Ҳодиса вақтида янги қурилаётган икки сатҳли қайрилиб олиш иншоотининг балкалари монтаж қилинаётган бўлган. Қўмита маълумотига кўра, краннинг бир томони олдин кўтарилгани сабабли балкага ортиқча юклама тушган ва натижада у синган.
Расмий изоҳда қайд этилишича, олдиндан зўриқтирилган бетон балкалар монтаж жараёнида лойиҳада кўзда тутилмаган юк шароитларига дуч келиши мумкин. Мазкур ҳолат лойиҳа доирасидаги қурувчи-консультант ташкилот томонидан ҳам тасдиқланган.
Ҳодиса оқибатида ҳеч ким жабрланмаган, атроф-муҳитга ҳам зарар етмаган. Қурувчи ташкилот томонидан синган балка бўлаклари объект ҳудудидан олиб чиқилган.
Ҳозирда ҳодисанинг сабабларини аниқлаш бўйича лойиҳа муҳандис-маслаҳатчиси — Temelsu International Engineering Services Inc. мутахассислари томонидан ўрганиш ишлари олиб борилмоқда.
