Сирдарёда Captiva ва юк машинаси тўқнашиб, уч киши ҳалок бўлди
Юк машинаси қайрилиб олаётганда ўзи билан бир йўналишдаги Captiva билан тўқнашган.
Сирдарё вилояти Ховос туманида Captiva ва Shacman русумли транспорт воситалари иштирокида йўл-транспорт ҳодисаси содир бўлди. Бу ҳақда Сирдарё ЙҲХБ хабар берди.
Маълум қилинишича, ҳодиса 9 август куни соат 10:30 атрофида халқаро аҳамиятдаги М-34 автомобиль йўлининг "Тошкент–Душанбе" йўналиши 125-километрида, қайрилиб олиш қисмида юз берган.
Дастлабки маълумотларга кўра, Shacman русумли транспорт воситаси қайрилиб олаётган вақтда ўзи билан бир йўналишда йўлнинг чап бўлаги бўйлаб ҳаракатланиб келаётган Captiva билан тўқнашган.
ЙТҲ оқибатида Captiva ҳайдовчиси ва икки нафар йўловчи воқеа жойида вафот этган.
Ҳолат юзасидан Сирдарё вилояти ИИБ ҳузуридаги Тергов бошқармаси томонидан Жиноят кодексининг 266-моддаси 3-қисми “а” банди билан жиноят иши қўзғатилган. Ҳозирда тергов ҳаракатлари олиб борилмоқда.
