Швейцариянинг Алп тоғларида бадавлат шахслар учун ер ости омборлари қурилмоқда
Қиммат буюмлар сақланган эски ҳарбий бункерлардан айримларини “Россия таҳдиди” фонида ўқ-дорилар учун қайта ишга тушириш имконияти кўриб чиқилмоқда.
Швейцариянинг Алп тоғларида ўта бой инсонларнинг қимматбаҳо буюмларини сақлашга мўлжалланган ер ости ғорлари ташкил этилмоқда. Лойиҳа келаси йилдан ишга туширилиши режалаштирилган. Бу ҳақда Point.md хабар берди.
Лойиҳа ишлаб чиқувчиси Томас Гассернинг маълум қилишича, Швейцариянинг марказий қисмидаги Брюниг массивида қарийб 20 та ер ости омбори жиҳозланади. Уларда санъат асарлари, қимматбаҳо металлар, коллексион автомобиллар ва қимматбаҳо виноларни сақлаш мумкин бўлади.
Иншоотларга кириш назорат-ўтказиш пунктидан бошланади. Шундан сўнг ташриф буюрувчилар бир нечта қўшимча текширувлардан ўтади. Хавфсизлик тизимининг тафсилотлари ошкор қилинмаган.
Ҳар бир ғордан фойдаланиш ҳуқуқи 99 йилга ижарага берилади. Нархлар 1 миллион Швейцария франкидан, яъни тахминан 1,07 миллион евродан бошланади. Лойиҳа муаллифлари бундай хизматга талаб юқори эканини таъкидламоқда. Айрим мижозлар аллақачон иншоотлардан фойдаланиш ҳуқуқини сотиб олган.
Томас Гассернинг айтишича, айрим бойлар ўз активларининг бир қисмини хавфсиз жойда сақлашга интилмоқда. У бу ҳолатни илгари хавфсиз ҳудуд сифатида кўрилган Дубайнинг жозибадорлиги борасидаги қарашлар ўзгараётгани билан изоҳлаган.
Қайд этилишича, Швейцарияда илгари қимматбаҳо буюмларни сақлаш учун эски ҳарбий бункерлардан фойдаланилган. Ҳозир мамлакат армияси “Россия таҳдиди” шароитида айрим бункерлардан яна фойдаланиш, хусусан, ўқ-дорилар ва зарур буюмларни сақлаш имкониятини ҳам кўриб чиқмоқда.
