Татаристонда ҳалок бўлган ўзбекистонликларнинг жасадлари Ватанга олиб келинди
Дронлар ҳужуми оқибатида 8 нафар Ўзбекистон фуқароси ҳалок бўлган эди.
Россиянинг Татаристон Республикаси Нижнекамск шаҳрида 10 август куни содир бўлган дронлар ҳужуми оқибатида ҳалок бўлган Ўзбекистон фуқароларининг жасадлари Ўзбекистонга олиб келинди. Бу ҳақда Ташқи ишлар Вазирлиги матбуот хизмати маълум қилди.
Ҳужум оқибатида Нижнекамскдаги қурилиш корхонасида ишлаган 8 нафар Ўзбекистон фуқароси ҳалок бўлган, яна бир қатор юртдошларимиз турли даражадаги тан жароҳатлари билан шифохоналарга жойлаштирилган эди.
Ўзбекистон Президентининг топшириғига мувофиқ тузилган Ҳукумат комиссияси томонидан ҳалок бўлган фуқароларнинг жасадларини Ватанга олиб келиш, жабрланганларга тиббий ва бошқа зарур ёрдам кўрсатиш ҳамда уларнинг оила аъзоларини қўллаб-қувватлаш бўйича тегишли чоралар кўрилди.
Ўзбекистоннинг Россиядаги Фавқулодда ва Мухтор Элчиси Б. Асадов ҳамда Ўзбекистоннинг Қозон шаҳридаги Бош консули Н. Қосимов воқеа жойига бориб, маҳаллий масъул идоралар билан музокаралар ўтказган.
Кўрилган чоралар натижасида 12 август куни махсус авиарейс орқали ҳалок бўлган фуқароларнинг жасадлари Ўзбекистонга олиб келинди.
Ташқи ишлар вазирлиги мазкур ҳолат билан боғлиқ барча масалаларни, жумладан, жабрланган фуқароларга зарур ёрдам кўрсатиш жараёнларини Россия томони билан ҳамкорликда назоратга олган.
