Колумбияда кон портлаши оқибатида олти киши ҳалок бўлди
Текширувдан аввал конда хавфсизлик талаблари бузилгани аниқланган ва унинг фаолиятини тўхтатиш ҳақида кўрсатма берилган.
Колумбиянинг марказий Кундинамарка департаментидаги Кукунуба ҳудудида жойлашган конда портлаш содир бўлиб, олти кончи ҳалок бўлди. Бу ҳақда Blu Radio департамент губернатори Хорхе Эмилио Рей Анхелга таяниб хабар берди.
Маълум қилинишича, ҳодиса Ла Рамада ҳудудидаги Эл Порвенир 1 конида юз берган. Портлашдан сўнг конда бўлган кончилар билан алоқа узилган.
Қутқарувчилар томонидан олиб борилган ишлар натижасида олти кончининг жасади топилган. Ҳодиса вақтида конда жами етти киши бўлган, улардан бири ўз кучи билан ташқарига чиқишга муваффақ бўлган.
Дастлабки маълумотларга кўра, кон портлашидан аввал Миллий кончилик агентлиги томонидан текширилган. Текширув давомида хавфсизлик талабларига риоя қилинмагани аниқланиб, камчиликлар бартараф этилгунга қадар кон фаолиятини тўхтатиш тўғрисида кўрсатма берилган.
Шунга қарамай, расмийларнинг маълум қилишича, кон фаолияти давом эттирилган бўлиши мумкин. Эндиликда мутахассислар портлаш сабабларини ва фаолиятни тақиқлаш ҳақидаги кўрсатмага қарамай, кончилик ишлари қандай давом этганини аниқлайди.
Кундинамарка губернатори ҳалок бўлган кончиларнинг яқинларига ҳамдардлик билдирди.
Эслатиб ўтамиз, 10 август куни Колумбияда 7,4 магнитудали кучли зилзила содир бўлган ва мамлакатда фавқулодда ҳолат эълон қилинган эди.
