Россияда оғир аҳволда қолган Ўзбекистон фуқароси ва унинг 6 фарзанди ватанга қайтарилди
Фуқаронинг ҳужжатлари йўқлиги сабабли у ва фарзандлари вақтинча сақлаш муассасаларидa бўлган.
Санкт-Петербургда оғир вазиятга тушиб қолган Ўзбекистон фуқароси ва унинг олти нафар фарзандининг ватанга қайтишига ёрдам кўрсатилди. Бу ҳақда “Дунё” АА хабар берди.
Маълум қилинишича, Ўзбекистон Бош консулхонаси дипломатлари Миграция агентлиги вакиллари билан ҳамкорликда М.М. ва унинг фарзандларига кўмаклашган.
Аввалроқ фуқаро ва унинг фарзандларида шахсини тасдиқловчи ҳамда Россиядан чиқиш ҳуқуқини берувчи ҳужжатлар бўлмаган. Шу сабабли М.М. Россиядаги хорижий фуқароларни вақтинча сақлаш муассасасига, унинг олти нафар фарзанди эса “Транзит” болалар ижтимоий бошпанасига жойлаштирилган.
Фарзандларидан узоқ вақт ажралиб қолишининг олдини олиш мақсадида зарур ҳужжатлар қисқа муддатда расмийлаштирилган.
Шундан сўнг М.М. ва унинг олти нафар фарзанди “Санкт-Петербург – Самарқанд” авиақатнови орқали Ўзбекистонга қайтарилган.
