Эрон Ўзбекистоннинг АҚШ-Исроил урушидаги позициясини олқишлади
Эрон ташқи ишлар вазири Ўзбекистоннинг Теҳроннинг АҚШ ва Исроилнинг ҳарбий тажовузига оид позициясини юқори баҳолаб, икки давлат ўртасидаги ҳамкорликни янада кенгайтиришга тайёрлигини билдирди.
Эрон ташқи ишлар вазири Аббос Ароқчи Теҳронда Ўзбекистон ташқи ишлар вазирининг биринчи ўринбосари Баҳромжон Алоев билан учрашувда Тошкентнинг АҚШ ва Исроилнинг Эронга қарши ҳарбий ҳаракатлари юзасидан билдирган позициясини олқишлади. Учрашув 17 август куни бўлиб ўтган. Бу ҳақда Тasnim news хабар берди.
Алоев Теҳронга Эрон ва Ўзбекистон ўртасидаги саккизинчи сиёсий маслаҳатлашувларда иштирок этиш учун борган. Ароқчи Ўзбекистоннинг Эронга нисбатан тутган позициясини «принципиал» деб баҳолаб, мамлакатнинг Эрон инқилоби етакчиси Оятуллоҳ Али Хоманаий хотирасига бағишланган маросимга юқори даражадаги делегация юборганини ҳам алоҳида қайд этган.
Эрон ташқи ишлар вазири Теҳрон ва Тошкент ўртасидаги сиёсий алоқаларни янада ривожлантириш, ўзаро ташриф ва алмашинувларни кенгайтириш зарурлигини таъкидлади. Шунингдек, икки давлат муносабатларидан фойдаланиб, Эрон ва Марказий Осиё мамлакатлари ўртасидаги минтақавий ҳамкорликни кучайтириш муҳимлигини билдирган.
Унинг фикрича, бундай ҳамкорлик минтақавий хавфсизликни таъминлаш, иқтисодий ва савдо алоқаларини кенгайтиришга хизмат қилиши мумкин.
Ўз навбатида, Баҳромжон Алоев Ўзбекистоннинг Эрон билан ўзаро манфаатли барча йўналишларда кенг қамровли ҳамкорликни ривожлантиришга тайёрлигини билдирди. Шунингдек, у Ўзбекистон ташқи ишлар вазири Бахтиёр Саидовнинг Ароқчига саломини етказган.
