Туркияда 10 нафарга яқин Ўзбекистон фуқароси шубҳали пул ўтказмалари бўйича тергов қилинмоқда
Уларнинг айримлари суд қарорига асосан жазони ижро этиш муассасасида, айримлари эса депортация марказида сақланмоқда.
Туркиянинг Айдин вилоятида Ўзбекистон фуқаролари банк карталари орқали амалга оширилган шубҳали пул ўтказмалари билан боғлиқ ҳолат юзасидан тергов қилинмоқда. Бу ҳақда Ўзбекистоннинг Истанбулдаги Бош консулхонаси маълум қилди.
Туркия Ички ишлар вазирлигининг тегишли тузилмаларидан олинган дастлабки маълумотларга кўра, ҳозирда 10 нафарга яқин Ўзбекистон фуқаросига нисбатан тергов-суриштирув ишлари олиб борилмоқда.
Қайд этилишича, уларнинг айримлари суд қарорига асосан жазони ижро этиш муассасасида, айримлари эса депортация марказида сақланмоқда. Яна бир қисми мамлакат ҳудудидан чиқмаслик шарти билан озод қилинган ва уларга нисбатан тергов ҳаракатлари давом эттирилмоқда.
Фуқароларга нисбатан қўлланаётган ҳуқуқий чоралар уларнинг ҳолатга алоқадорлик даражаси, банк ҳисобварақлари орқали ўтказилган маблағлар миқдори ҳамда тергов давомида аниқланаётган бошқа ҳолатлардан келиб чиқиб белгиланмоқда.
Ўзбекистоннинг Истанбулдаги Бош консулхонаси вазиятни Туркиянинг тегишли идоралари билан ҳамкорликда кузатиб бормоқда. Фуқароларнинг қонуний ҳуқуқ ва манфаатларини ҳимоя қилиш доирасида зарур консуллик-ҳуқуқий ёрдам кўрсатилмоқда.
Бош консулхона фуқароларни банк карталари, ҳисоб рақамлари ва мобил банк хизматларини бегона шахсларга бермасликка, шунингдек, келиб чиқиши номаълум маблағларни қабул қилмаслик ва ўтказмасликка чақирди.
Қайд этилишича, банк картаси ёки ҳисоб рақамини бошқа шахслар фойдаланиши учун бериш, шунингдек, келиб чиқиши номаълум маблағларни ўтказишда воситачилик қилиш Туркия қонунчилигига кўра жиддий ҳуқуқий жавобгарликка сабаб бўлиши мумкин.
