Қирғизистон-Ўзбекистон чегарасидаги Мамай пункти қайта очилиши мумкин
Шунингдек, Карбен–Мамай автомобиль йўлини қуриш лойиҳаси ҳам кўриб чиқилмоқда.
Қирғизистон-Ўзбекистон чегарасида 2020 йилда ёпилган Мамай назорат-ўтказиш пунктини қайта очиш масаласи муҳокама қилинмоқда. Шунингдек, Карбен–Мамай автомобиль йўлини қуриш масаласи ҳам халқаро назорат-ўтказиш пункти лойиҳаси доирасида кўриб чиқилмоқда.
Бу ҳақда 18 август куни Қирғизистон президентининг махсус топшириқлар бўйича махсус вакили Бакит Торобаев маълум қилди.
Унинг таъкидлашича, пунктнинг қайта очилиши икки давлатнинг чегарадош ҳудудлари ўртасидаги савдо-иқтисодий ва туризм алоқаларини ривожлантиришга хизмат қилади.
Торобаевга кўра, назорат-ўтказиш пункти ишга туширилса, маҳаллий аҳоли маҳсулотларини қўшни давлатга экспорт қилиш имкониятига эга бўлади. Шунингдек, Падиш-Ота, Сари-Челек ва Қора-Қамиш каби туристик масканларга сайёҳлар оқимини ошириш ҳамда ҳудуддаги иқтисодий фаолликни кучайтириш кутилмоқда.
Мамай назорат-ўтказиш пункти 2020 йилда ёпилган. Сўнгги йилларда Қирғизистон парламенти депутатлари уни қайта очиш масаласини бир неча бор кўтарган.
Маълумот учун, 2026 йил июль ойида Қирғизистон ва Ўзбекистон чегара ўтиш пунктлари сонини 15 тадан 30 тагача оширишга келишиб олган. Шунингдек, Ўзбекистон фуқароларига Қирғизистонда 15 кунгача рўйхатдан ўтмасдан қолиш имконияти берилган.
