Россия ва Украина 103 нафардан ҳарбий асирни алмашди
Украина ҳарбий разведкаси навбатдаги алмашинув ҳам ой охиригача амалга оширилиши кутилаётганини маълум қилди.
Россия ва Украина 103 нафардан ҳарбий асирни алмашди. Бу ҳақда ҳар икки томон расмийларига таяниб, Reuters хабар берди.
Маълум қилинишича, Украина ҳарбий разведкаси ой охиригача яна бир асирлар алмашинуви ўтказилиши кутилаётганини билдирган.
Россия 2022 йилда Украинага бостириб кирганидан буён томонлар мунтазам равишда ҳарбий асирларни алмашиб келмоқда. Шу билан бирга, урушни якунлаш бўйича келишув шартлари юзасидан Киев ва Москва ўртасидаги позициялар ҳамон бир-биридан кескин фарқ қилади.
Украина Президенти Володимир Зеленскийнинг Телеграмъдаги саҳифасида қайд этилишича, Россиядан қайтарилган украиналик ҳарбийлар орасида Қуролли Кучлар, Давлат чегара хизмати ва Миллий гвардия хизматчилари бор.
Россия томонидаги алмашинув ҳақида эса Интерфакс агентлиги Мудофаа вазирлигига таяниб хабар берди.
Уч йил давомида асирликда бўлган 29 ёшли украиналик Дмйтро Reuters агентлигига уйига қайтганидан хурсандлигини айтди. У ҳали ҳам асирликда қолаётган ҳарбийларнинг оилаларини умидни йўқотмасликка чақирди.
28 ой давомида асирликда бўлган 43 ёшли украиналик ҳарбий Антон Тимосенко эса асирлик даврида улар учун энг муҳим нарса қариндошларидан келган хатлар бўлганини айтди. Ҳар икки ҳарбий ҳам урушнинг қайси ҳудудларида жанг қилгани ҳақида маълумот бермаган.
Украина ҳарбий разведкаси раҳбари Олег Ивашченко навбатдаги алмашинув ой охиригача амалга оширилиши кутилаётганини маълум қилди. Унинг сўзларига кўра, кейинги алмашинувда узоқ вақт давомида асирликда сақланган ҳарбийлар, жумладан, урушнинг дастлабки босқичида Россия қамал қилган Мариупол шаҳри мудофаасида қатнашган украиналик ҳимоячиларни қайтариш кутилмоқда.
