Тошкентда маданият ва санъат соҳасидаги ислоҳотлар муҳокама қилиниб, янги раҳбарлар тайинланди
Йиғилишда соҳадаги камчиликлар танқид қилиниб, йил якунига қадар намунали кўрсаткичларга эришиш вазифаси белгиланди.
Тошкентда маданият ва санъат соҳасидаги ислоҳотларнинг ижроси муҳокама қилиниб, пойтахт маданият бошқармасига янги раҳбарлар тайинланди.
21 август куни маданият вазири Озодбек Назарбеков Тошкент шаҳрида соҳада амалга оширилаётган ишлар, ислоҳотларнинг ижроси ҳамда келгусидаги устувор вазифаларга бағишланган йиғилиш ўтказди.
Унда Тошкент шаҳар ҳокимининг туризм, маданият, маданий мерос ва оммавий коммуникациялар масалалари бўйича ўринбосари Азизхон Шовкатов, Маданият вазирлиги марказий аппарати раҳбарлари ҳамда пойтахтдаги маданият ва санъат соҳаси масъуллари иштирок этди.
Йиғилишда маданият марказлари фаолиятини трансформация қилиш, соҳага тадбиркорларни жалб этиш учун имтиёзлар жорий этиш, маданият, санъат ва адабиёт йўналишларида 21 та ижодий бирлашма ташкил этиш каби ишлар амалга оширилаётгани қайд этилди.
Шунингдек, болалар мусиқа мактаблари ўқитувчиларининг иш ҳақи умумтаълим мактаблари ўқитувчилари маошига тенглаштирилгани, 16 та ихтисослаштирилган мактаб-интернат ва 3 та олий мактаб ташкил этилгани таъкидланди. Ижодкор ёшлар ва устозларни молиявий рағбатлантириш, уй-жой, ижара ҳақи, даволаниш ҳамда тиббий суғурта бўйича қатор имтиёзлар белгиланган.
Вазир Тошкент шаҳрида амалга оширилаётган ислоҳотлар ва уларнинг ижроси етарли даражада эмаслигини танқид қилди. У соҳа ходимлари 2026 йил 21 апрелдаги 150-сон қарор ва 2 июндаги 103-сон Фармонда белгиланган вазифаларни чуқур ўзлаштириб, уларни амалиётга самарали татбиқ этиши зарурлигини таъкидлади.
Йиғилишда кадрлар масаласи ҳам кўриб чиқилди.
Бекзод Бахромов Тошкент шаҳар маданият бошқармаси бошлиғи этиб тайинланди. У бунгача мазкур бошқармада раҳбар ўринбосари лавозимида фаолият юритган.
Шукурилло Исроилов эса Тошкент шаҳар маданият бошқармаси бошлиғи ўринбосари лавозимига тайинланди. У тайинловга қадар “Ўзбекконсерт” давлат муассасасида бадиий сўз устаси бўлиб ишлаган.
Йиғилиш якунида Тошкент шаҳри йил охиригача маданият ва санъат соҳасининг барча йўналишларида намунали кўрсаткичларга эришиши лозимлиги таъкидланди. Янги тайинланган раҳбарлар зиммасига ислоҳотларни самарали амалга ошириш, мавжуд камчиликларни бартараф этиш ва белгиланган вазифалар ижросини таъминлаш бўйича вазифалар юклатилди.
