Шавкат Мирзиёев Cингапурнинг Катта вазирини қабул қилди
Томонлар икки томонлама алоқаларни, инвестициявий ҳамкорликни ҳамда Cингапур тажрибасини Ўзбекистонда жорий этишни кенгайтириш масалаларини кўриб чиқди.
Шавкат Мирзиёев 28 август куни Cингапур Республикасининг Катта вазири Ли Сянь Лун бошчилигидаги делегацияни қабул қилди.
Мулоқот аввалида Ли Сянь Лун Cингапур Президенти Тарман Шанмугаратнам ва Бош вазири Лоуренс Вонгнинг самимий саломи ҳамда эзгу тилакларини етказди.
Томонлар сиёсий мулоқот ва икки томонлама алоқалар изчил ривожланиб бораётганини мамнуният билан қайд этди. Товар айирбошлаш ҳажми ва қўшма корхоналар сони ҳам жадал ўсмоқда. Cингапурнинг Ўзбекистон иқтисодиётига киритган инвестициялари қарийб 2 миллиард долларни ташкил этган.
Cингапур ишбилармонларининг Ўзбекистондаги инвестициявий фаолиятини янада кенгайтириш режалари қўллаб-қувватланди. Савдо, инвестициялар, технологиялар трансфери, давлат бошқарувини модернизация қилиш, инсон капиталини ривожлантириш ва рақамлаштиришни қамраб олувчи стратегик ва инновацион шериклик бўйича ўрта муддатли қўшма дастур ишлаб чиқишга келишиб олинди.
Шунингдек, Ўзбекистондаги махсус иқтисодий зоналарни такомиллаштириш, Тошкент халқаро молия маркази ва рақамли банк тизимини ривожлантиришда Cингапур тажрибасидан фойдаланишга алоҳида эътибор қаратилди.
Cингапур олий таълим муассасаларининг Ўзбекистондаги фаолиятини қўллаб-қувватлаш давом эттирилиши билдирилди.
Учрашувда юқори даражада эришилган келишувларни амалга оширишни мувофиқлаштириш мақсадида сиёсий ва иқтисодий тузилмалар ўртасида мунтазам мулоқотни йўлга қўйиш муҳимлиги таъкидланди.
Шунингдек, Ўзбекистоннинг БМТнинг Медиация тўғрисидаги Cингапур конвенциясига қўшилгани олқишланди. Халқаро ташкилотлар доирасидаги ўзаро қўллаб-қувватлаш ва минтақавий ҳамкорлик масалалари юзасидан ҳам фикр алмашилди.
