АҚШ Эроннинг учта нефть танкерига зарба берди

АҚШ ҳарбийлари Эроннинг учта нефть танкерига зарба берди. АҚШ Марказий қўмондонлиги (CENTCOM) маълум қилишича, ҳужум Эрон Ислом инқилоби қўриқчилари корпуси (ИИҚК) томонидан АҚШ ҳарбий-денгиз кучларининг икки кемасига баллистик ракеталар учирилганидан кейин амалга оширилган.

 

Зарба берилган танкерларнинг бири Эроннинг асосий нефть экспорт терминали жойлашган Харг ороли яқинида бўлган. АҚШ томони ҳужум оқибатида икки танкер доимий равишда фойдаланишдан чиқарилгани, яна бир юкланмаган танкер эса йўқ қилинганини билдирган.

 

CENTCOM раҳбари адмирал Бред Купернинг айтишича, АҚШ кемаларига ҳужум қилинса, Вашингтон Эроннинг нефть ташиш имкониятларига қарши янада кескин чоралар кўриши мумкин.

 

“Агар сиз бизнинг иккита кемамизга ўқ узсангиз, биз бундан ҳам каттароқ иқтисодий зарар етказамиз — сизнинг учта кемангизни йўқ қиламиз”, — деган Купер.

 

АҚШ Марказий қўмондонлиги маълумотларига кўра, Эрон томонидан учирилган ракеталар нишонига олинган АҚШ авиаташувчиси ва бошқариладиган ракета ташувчи эсминец ҳужумлардан қочишга муваффақ бўлган. Америка ҳарбий хизматчиларидан ҳеч ким жароҳатланмаган.

 

Эроннинг Tasnim агентлиги эса Харг ороли яқинидаги лангар ташлаш ҳудудида турган танкерга АҚШнинг тўртта ракетаси текканини хабар қилган. Агентликка кўра, ҳодиса оқибатида қурбонлар бўлмаган, танкер экипажи эса эвакуация қилинган.

 

Эрон расмийлари ҳужумларга ҳозирча расман муносабат билдирмаган.

 

Reuters қайд этишича, ҳодиса АҚШ ва Эрон ўртасидаги сўнгги кунларда кучайган қарама-қаршиликлар фонида юз берди. Можаро февраль ойида АҚШнинг Эронга қарши зарбаларидан сўнг кескинлашган ва минтақадаги энергия таъминотига жиддий таъсир кўрсатган.

 

АҚШ Президенти Доналд Трамп 31 август куни Харг ороли “майда бўлакларга парчаланаётганини” айтган. Эрон расмийлари эса оролга ҳужум қилинган тақдирда кескин жавоб қайтарилишини билдирган.