АҚШ хорижий давлат хизматчилари фарзандларига фуқаролик беришни чекламоқчи
Таклиф хорижий элчихона ва консулликларнинг айрим ходимлари фарзандларига ҳам тааллуқли бўлиши мумкин.
АҚШ маъмурияти хорижий давлат хизматчиларининг фарзандларига туғилиш орқали мамлакат фуқаролигини беришни чеклашни таклиф қилмоқда. Бу ҳақда АҚШ Ички хавфсизлик департаментининг 4 cентябр куни Федерал реестрда эълон қилинган билдиришномасида маълум қилинган.
Департаментнинг билдиришномасига кўра, амалдаги тартибда АҚШ ҳудудида туғилган хорижий дипломатларнинг фарзандлари дипломатик мақом сабабли автоматик равишда АҚШ фуқаролигини олмайди. Шу билан бирга, улар қонуний доимий резидент сифатида рўйхатдан ўтиш ҳуқуқига эга.
Янги ёндашувни камида бир нафар ота-онаси хорижий давлат хизматчиси бўлган, туғилган пайтда ота-онасининг ҳеч бири АҚШ фуқароси бўлмаган болаларга ҳам татбиқ этиш таклиф қилинмоқда.
Департамент хорижий давлат хизматчилари қаторига дипломатлардан ташқари, хорижий элчихоналар ва консулликларнинг айрим ходимлари, шунингдек, айрим халқаро ташкилотлар вакилларини ҳам киритмоқда.
Мазкур қоидалар 4 cентябрдан кучга кириши кўзда тутилган эди. Бироқ ҳозирча АҚШда фуқаролик бериш амалиётига ўзгартириш киритилмайди.
Бунга сабаб — 2 cентябр куни Мериленд штатидаги федерал округ суди Президент Доналд Трампнинг туғилиш орқали фуқароликни чеклашга қаратилган тегишли фармонини вақтинча тўхтатиб қўйгани. Суд мазкур фармон АҚШ Олий судининг аввалги қарорига зид бўлиши мумкинлигини қайд этган.
Аввалроқ, июнь ойида АҚШ Олий суди Трампнинг туғилиш орқали фуқароликни чеклашга қаратилган бошқа фармони бўйича ҳам қарор чиқарган эди.
