Саудия Арабистони АҚШдан 5 миллиард долларлик авиабомбалар сотиб олади
Битим доирасида 227 ва 907 килограммлик 10 мингта авиабомба етказиб берилиши кўзда тутилган.
АҚШ Давлат департаменти Саудия Арабистонига қиймати қарийб 5 миллиард долларга тенг JDAM-ER узоқ масофага учадиган аниқ бошқариладиган ўқ-дорилар ва уларга тегишли ускуналарни сотишни маъқуллади. Бу ҳақда Reuters хабар берди.
АҚШ Давлат департаменти баёнотида таъкидланишича, таклиф этилаётган савдо Саудия Арабистонининг ҳаво мудофааси салоҳиятини кучайтириш, минтақадаги мавжуд ва келажакдаги таҳдидларга қарши туриш ҳамда АҚШ ва Форс кўрфази минтақасидаги бошқа ҳамкорлар қўллайдиган тизимлар билан ўзаро ҳамкорликни яхшилашга хизмат қилади.
Департамент мазкур келишув АҚШнинг ташқи сиёсати ва миллий хавфсизлик мақсадларига ҳам мос келишини билдирган.
Саудия Арабистони жами 10 мингта JDAM-ER ўқ-дориси ва йўналтирувчи тўпламларни сўраган. Улар орасида 227 килограммлик 5 мингта ва 907 килограммлик яна 5 мингта авиабомба мавжуд.
JDAM-ER — анъанавий бомбаларни GPS орқали бошқариладиган юқори аниқликдаги ўқ-дориларга айлантириш имконини берувчи тизим бўлиб, очиладиган қанотлар ва бошқариладиган дум қисмига эга. Унинг учиш масофаси 75 километргача етиши мумкин.
Келишув бўйича бош пудратчи сифатида Boeing кўрсатилган.
Шунингдек, АҚШ Давлат департаменти Саудия Арабистонига қарийб 750 миллион долларга AGT-1500 двигателларини сотиш имкониятини ҳам маъқуллаган. Мазкур маҳсулотларни Honeywell етказиб бериши кўзда тутилган.
Бироқ JDAM-ER ўқ-дориларини Саудия Арабистонига сотиш бўйича келишув ҳали якуний кучга киргани йўқ. АҚШ Давлат департаменти бу ҳақда Конгрессни хабардор қилган ва битим қонунчилар томонидан кўриб чиқилиши керак.
