Шавкат Мирзиёев амалий ташриф билан Сербияга боради
Белградда Ўзбекистон ва Сербия расмийлари ҳамда ишбилармонлари иштирокида бизнес форуми ўтказилади.
Президент Шавкат Мирзиёев Сербия Президенти Александр Вучичнинг таклифига биноан 7–8 сентябрь кунлари ушбу мамлакатга расмий ташриф билан боради.
Ташриф дастурига мувофиқ, Белград шаҳрида Ўзбекистон ва Сербия давлат раҳбарлари ўртасида олий даражадаги музокаралар ўтказилади. Шунингдек, икки мамлакатнинг расмийлари ва ишбилармон доиралари вакиллари иштирокида бизнес форуми ташкил этилади.
Музокаралар кун тартибидан Ўзбекистон–Сербия кўп қиррали шериклигини янада мустаҳкамлаш ва ривожлантириш масалалари ўрин олган.
Савдо-иқтисодий ва инвестициявий ҳамкорликни кенгайтириш, шунингдек, транспорт, машинасозлик, енгил ва озиқ-овқат саноати, қишлоқ хўжалиги, фармацевтика ҳамда ахборот технологиялари каби устувор йўналишларда қўшма лойиҳаларни амалга оширишга алоҳида эътибор қаратилади.
Томонлар, шунингдек, тартибли меҳнат миграцияси соҳасида ҳамкорликни йўлга қўйиш, ҳудудлараро ва маданий-гуманитар алоқаларни кенгайтириш масалаларини муҳокама қилади.
Ташриф якунида ҳукуматлараро ва идоралараро келишувлардан иборат салмоқли ҳужжатлар тўпламини қабул қилиш кўзда тутилган.
