Трамп Россия ва Украинага музокаралар учун вакилларини юбормоқда

АҚШ президенти Доналд Трамп Россия ва Украина ўртасидаги урушни тугатиш бўйича дипломатик саъй-ҳаракатларни қайта жонлантириш учун махсус вакили Стив Уиткофф ва куёви Жаред Кушнерни икки давлатга юбормоқда. Улар Россия ва Украина раҳбарияти билан музокаралар ўтказиши режалаштирилган. Бу ҳақда СNN хабар берди.

 
Уиткофф ва Кушнер аввал Москвага бориб, Россия президенти Владимир Путин билан учрашиши, шундан сўнг Киевга йўл олиши кутилмоқда. Бу Уиткофф ва Кушнернинг АҚШнинг Трамп маъмурияти даврида Украинага илк ташрифи бўлади. СNN маълумотига кўра, Россияга сафар 5 cентябр, Киевга ташриф эса 6 cентябрга режалаштирилган.

 
Трамп музокаралар учун “аниқ таклиф” мавжудлигини билдирган, бироқ унинг мазмуни ҳақида батафсил маълумот бермаган. Уиткофф аввал ҳам Россияга бир неча бор бориб, Путин билан музокаралар ўтказган. Кушнер эса Трамп маъмуриятининг дипломатик саъй-ҳаракатларида фаол иштирок этиб келмоқда.

 
Украина президенти Владимир Зеленский АҚШ вакилларининг Киевга ташрифини тасдиқлаган. У музокараларни мазмунли ва амалий ўтказиш муҳимлигини таъкидлаб, Россияни ҳам учрашувлар вақтида ҳаво ҳужумларини тўхтатишга чақирган.

 “Биз томондан ҳаво ҳужумлари бўлмайди, Россия ҳам музокаралар давомида ўз ҳужумларини тўхтатиши керак”, деган Зеленский.

 
Қайд этилишича, Россия президенти Владимир Путин Украина ҳудудининг катта қисмини топшириш, НАТОга қўшилиш режасидан воз кечиш ва Украина армияси салоҳиятини кескин қисқартириш каби талабларини ўзгартирмаган.

 
АҚШнинг янги дипломатик ташаббуси урушни якунлаш бўйича музокараларни қайта бошлашга қаратилган. Бироқ томонларнинг асосий талабларида ҳозирча сезиларли яқинлашув кузатилмаган.