Украина уч кунлик сулҳ жорий этди
5–8 сентябрь давом этадиган сулҳ АҚШ вакилларининг Россия ва Украина ташрифлари арафасида жорий этилиши кутилмоқда.
Украина Қуролли Кучларига 5 сентябрь соат 00:00 дан 8 сентябрь соат 23:59 гача алоқа чизиғи бўйлаб сулҳга риоя қилиш буюрилгани ҳақида хабар берилди. Бу ҳақда “Украинска Правда” нашри ўз манбаларига таяниб хабар қилган.
Нашр маълумотларига кўра, уч кунлик сулҳ қуруқлик, ҳаво ва денгиздаги ҳарбий ҳаракатларга тааллуқли бўлади. Олий Рада депутати Алексей Гончаренко ҳам Украина Қуролли Кучлари тегишли буйруқ олганини маълум қилган.
Бундан аввал Украина президенти Владимир Зеленский америкалик музокарачилар мамлакатда бўладиган даврда Россия ҳудудига ҳаво ҳужумларини тўхтатиш ҳақида баёнот берган эди.
АҚШ президентининг махсус элчилари Стив Виткофф ва Жаред Кушнернинг 5–6 сентябрь кунлари Москва ва Киевга ташриф буюриши кутилмоқда. АҚШ томони мазкур ташрифлар доирасида Россия ва Украина ўртасидаги можарони ҳал этиш бўйича ташаббусларни муҳокама қилишни режалаштираётгани айтилган.
Шу билан бирга, сулҳнинг жорий этилиши юзасидан дастлаб расмий тасдиқ бўлмагани ҳақида ҳам хабарлар берилган. Россия томони эса Зеленскийнинг аввалги сулҳ ташаббусларини танқид қилиб, уларни можарони тўлиқ ҳал этишга қаратилмаган деб баҳолаган.
Россия ташқи ишлар вазири Сергей Лавров Россия Украина билан музокаралар олиб боришга тайёрлигини яна бир бор билдирган.
