Марказий Осиё давлатлари президентлари Сеулда учрашади
16 сентябрь куни Сеулда Жанубий Корея ва Марказий Осиёнинг беш давлати раҳбарлари иштирокида илк саммит ўтказилади.
Жанубий Корея президенти Ли Же Мён Марказий Осиёнинг беш давлати раҳбарлари иштирокидаги мазкур саммитни ўтказади. Бу ҳақда Reuters хабар берди.
Саммитда Ўзбекистон, Қозоғистон, Қирғизистон, Тожикистон ва Туркманистон раҳбарлари иштирок этади. Учрашувда савдо, инвестициялар, энергетика, муҳим фойдали қазилмалар ва таъминот занжирлари соҳаларидаги ҳамкорликни кенгайтириш масалалари муҳокама қилинади.
Жанубий Корея президенти саммит олдидан, 14–16 сентябрь кунлари Марказий Осиёнинг ҳар бир давлати раҳбари билан алоҳида икки томонлама учрашувлар ҳам ўтказади.
Ли Же Мённинг таъкидлашича, саммит Жанубий Корея ва Марказий Осиё ўртасидаги муносабатларни давлат раҳбарлари даражасидаги кўп томонлама ҳамкорлик тизимига олиб чиқишга хизмат қилади. Сеул бу орқали минтақа билан иқтисодий ва стратегик алоқаларни янада мустаҳкамлашни кўзламоқда.
Жанубий Корея Ташқи ишлар вазирлиги маълумотларига кўра, саммит 16–17 сентябрь кунлари ўтказилади. Томонлар тайёргарлик жараёнида келгусидаги ҳамкорлик йўналишлари ҳамда саммит якунлари бўйича ҳужжатларни муҳокама қилган.
Саммит Сеулнинг Марказий Осиё билан иқтисодий, энергетика ва инфратузилма соҳаларидаги алоқаларни ривожлантиришга қаратилган сиёсати доирасидаги муҳим тадбирлардан бири сифатида баҳоланмоқда.
