Шавкат Мирзиёев Никол Пашинян билан телефон орқали гаплашди
Президент Бош вазир билан суҳбатда Арманистон ва Озарбайжон ўртасидаги Тинчлик шартномасини тез фурсатда имзолаш борасидаги саъй-ҳаракатларни юксак баҳолади.
Шавкат Мирзиёев 11 сентябрь куни Арманистон Бош вазири Никол Пашинян билан телефон орқали мулоқот қилди.
Суҳбат давомида Ўзбекистон ва Арманистон ўртасидаги муносабатларни, хусусан, савдо-иқтисодий ва инвестициявий ҳамкорликни янада ривожлантириш масалалари муҳокама қилинди.
Томонлар саноат кооперацияси доирасида янги қўшма лойиҳаларни ишлаб чиқиш муҳимлигини қайд этдилар.
Шунингдек, Марказий Осиё ва Жанубий Кавказни боғловчи логистика ва транспорт йўлакларини ривожлантириш орқали минтақалараро ўзаро боғлиқликни мустаҳкамлаш масаласига алоҳида эътибор қаратилди.
Шавкат Мирзиёев Арманистон ва Озарбайжон ўртасида минтақавий барқарорлик ва тараққиёт учун муҳим аҳамиятга эга Тинчлик шартномасини тез фурсатда имзолаш борасидаги саъй-ҳаракатларни юксак баҳолади.
Мулоқотда, шунингдек, икки томонлама ва кўп томонлама тадбирлар режаси, жумладан, БМТ ва МДҲ доирасидаги ҳамкорлик масалалари кўриб чиқилди.
