Шавкат Мирзиёев “ROX Group” компанияси асосчисини қабул қилди
Учрашувда амалдаги ва янги лойиҳаларни “йўл харитаси” асосида жадаллаштиришга келишилди.
Шавкат Мирзиёев 11 сентябрь куни Ветнамнинг “ROX Group” компанияси асосчиси Ан Туан Чанни қабул қилди.
Учрашувда Ўзбекистон ва компания ўртасидаги ўзаро манфаатли ҳамкорликни ривожлантириш ҳамда мамлакатимизда истиқболли инвестиция лойиҳаларини амалга ошириш масалалари муҳокама қилинди.
1996 йилда ташкил этилган “ROX Group” Ветнамнинг йирик кўп тармоқли инвестиция гуруҳларидан бири ҳисобланади. Компания кўчмас мулк, энергетика, банк, меҳмонхона бизнеси ва хизмат кўрсатиш соҳаларида фаолият юритади.
Музокаралар давомида Ўзбекистонда замонавий шаҳар ва саноат инфратузилмасини ривожлантириш, қайта тикланувчи энергетика, геология, молия ҳамда туризм йўналишлари ҳамкорликнинг устувор соҳалари сифатида белгиланди.
Учрашув якунида “ROX Group” иштирокидаги амалдаги ва янги инвестиция лойиҳаларини “йўл харитаси” асосида жадаллаштириш бўйича келишувга эришилди.
