Хурмузда музокаралар тўхтаб қолди: нефть бозори яна хавотирда

Эрон ва Форс кўрфази давлатлари иштирокида ўтказилиши керак бўлган музокаралар Омон томонидан илгари сурилган Хурмуз бўғози орқали кемалар ҳаракатини тартибга солиш таклифини муҳокама қилишга қаратилган эди. Бироқ томонлар ўртасида ҳозирча консенсусга эришилмагани сабабли учрашув кейинга қолдирилди.

Омон Ташқи ишлар вазири Бадр ал-Бусаидий музокараларнинг қолдирилиши қарорини томонлар ўртасида келишувга эришиш манфаатлари билан изоҳлади. Эрон расмийлари эса учрашув айрим минтақавий давлатларнинг илтимосига кўра, Теҳрон ва Масқат ўртасидаги келишув асосида қолдирилганини маълум қилди. Янги сана Омон билан мувофиқлаштирилиши кутилмоқда.

Хурмуз бўғози жаҳон энергетика таъминоти учун стратегик аҳамиятга эга. У орқали ҳар куни катта ҳажмдаги нефть ва нефть маҳсулотлари ташилади. Шу боис минтақадаги ҳар қандай кескинлик халқаро нефть бозорида нархлар ошиши хавфини юзага келтиради.

Музокаралар қолдирилган пайтда Саудия Арабистонида ҳам нефть инфратузилмаси билан боғлиқ муаммолар кузатилмоқда. Reuters маълумотига кўра, дронлар ҳужуми оқибатида шикастланган Шарқ–Ғарб нефть қувури вақтинча ишдан тўхтатилган. Қувурнинг узоқ вақт ишламаслиги Саудия Арабистонининг нефть экспорти имкониятларига таъсир қилиши мумкин.

Айни пайтда Хурмуз бўғозида кемалар ҳаракати билан боғлиқ хавфлар ҳам сақланиб қолмоқда. Денгиз хавфсизлиги органлари айрим тижорий кемалар ҳужумга учрагани ҳақида маълумот берган.

Воқеалар фонида нефть нархлари ҳам кўтарилган. Reuters хабар беришича, нефть нархи ўтган ҳафта июль ойидан бери биринчи марта баррел учун 100 доллардан юқори кўтарилган.

Мутахассислар фикрича, Хурмуз бўғозидаги вазиятнинг узоқ вақт беқарор қолиши нафақат Яқин Шарқ, балки бутун жаҳон энергетика бозорига жиддий босим ўтказиши мумкин.