Шавкат Мирзиёев “KIND” корпорацияси бош ижрочи директори билан учрашди
Тошкентнинг янги халқаро аэропорти атрофидаги ҳудудни ривожлантириш бўйича мастер-режа ишлаб чиқиш масаласи муҳокама қилинди.
Ўзбекистон Президенти Корея Республикасига ташрифининг ишбилармонлик дастури доирасида Кореянинг хорижий инфратузилма ва урбанизацияни қўллаб-қувватлаш корпорацияси — “KIND”раҳбари билан музокара ўтказди.
Учрашувда Ўзбекистон транспорт ва ижтимоий инфратузилмасини ривожлантириш бўйича ҳамкорликни кенгайтириш масалалари муҳокама қилинди. Томонлар қўшма инвестиция платформаси ташкил этилганини ижобий баҳоладилар.
Шунингдек, янги илмий-саноат биокластерини ташкил этиш лойиҳасига алоҳида эътибор қаратилди. Унда илм-фан, саноат ва замонавий технологияларни ягона экотизимга бирлаштириш муҳимлиги таъкидланди.
Мулоқот давомида Тошкентнинг янги халқаро аэропорти атрофидаги ҳудудни ривожлантириш бўйича мастер-режа ишлаб чиқиш масаласи ҳам кўриб чиқилди. Режада аэропорт, замонавий логистика хаблари ва турар жой инфратузилмасини ўзаро боғланган ягона тизим сифатида ривожлантириш назарда тутилиши қайд этилди.
