Шавкат Мирзиёев Корея Республикаси Бош вазири билан учрашди
Учрашувда рақамли иқтисодиёт, киберхавфсизлик, муҳим минералларни қайта ишлаш ва транспорт инфратузилмаси устувор йўналишлар сифатида қайд этилди.
Шавкат Мирзиёев Корея Республикаси Бош вазири Хан Сон Сук билан учрашди. Мулоқотда икки давлат ўртасидаги алоҳида стратегик шерикликни янада ривожлантириш масалалари муҳокама қилинди.
Сеул шаҳридаги Президент учун ажратилган қароргоҳда бўлиб ўтган учрашувда савдо-иқтисодий ва инвестициявий ҳамкорликни кенгайтириш, технологияларни ривожлантириш ҳамда транспорт-логистика соҳаларидаги шерикликни мустаҳкамлаш истиқболлари кўриб чиқилди.
Томонлар инновацион-технологик ҳамкорликни чуқурлаштиришга алоҳида эътибор қаратди.
Хусусан, савдо, молия ва инвестициялар, рақамли иқтисодиёт ҳамда киберхавфсизлик йўналишларида ҳамкорликни ривожлантириш масалалари юзасидан фикр алмашилди.
Шунингдек, Кореянинг илғор технологиялари ва Ўзбекистоннинг хомашё салоҳиятидан фойдаланиб, муҳим минералларни қайта ишлаш, транспорт ва темир йўл инфратузилмасини ривожлантириш ҳамда ҳудудлараро алоқаларни кенгайтириш бўйича шериклик истиқболлари муҳокама қилинди.
